Kariakoo Dabi Ndio Hii

 

Karibu LigiKuu_Xtra. Bila shaka umekuja ukitegemea kuchoshwa kwa maneno mengi ya kiingereza ili tukuaminishe kuwa kuna utaalamu nyuma ya maneno haya. Lakini maeneo haya mienendo yetu ni ya tofauti sana. Tutafika kwenye kukuchosha lakini kabla ya hayo . . .

Leo tunajiuliza ni kwa nini mchezo wa soka unaambatana na hisia kali. Kwa nini sekunde chache kabla ya mechi kuanza huja na msukumo mzito wa damu katika mishipa ya kila shabiki. Kwa nini mzee mwenye ugonjwa wa moyo ashindwe kuangalia timu yake pendwa kwa hofu ya kupata mshtuko wa moyo. Tunaweza kupenda mchezo kiasi hiki? Wengi wetu tumezaliwa tukakuta wazazi ni mashabiki wakubwa sana wa soka. Utotoni tulianza kuvalishwa jezi kabla hata ya mashati. Tulipotaka kitu cha kuchezea tulipewa mpira. Tulipotaka kwenda safarini tulipelekwa uwanjani. Hivi ni kweli tuliamua kuupenda huu mchezo? Au hii ni mila yetu, tamaduni yetu, urithi wetu, ambao hakuna chaguo tofauti na kufata nyuma yake? Kwa nini tunapenda soka? Mbali zaidi, kwa nini tunapenda timu za kariakoo? Kwa nini shabiki anatetemeka wakati yeye hachezi wala hajatundikwa mzigo wa kupiga penati kwenye mechi ya dabi.

Muda huo tukiwa tunanongelea dabi. Hivi uligundua walichofanya Yanga katika dabi iliyopita ili kuwadhibiti washambuliaji na mabeki wa pembeni wa Simba. Miloud Hamdi alikuja na mpango kazi bora sana kwa ajili ya mechi ile.

Naam! Mpendwa msomaji wetu tulipenda sana wakati huu walau uchelewe kuja lakini kwa bahati mbaya haiwezekani. Huu ndio ule muda wa kukukera na kukuchosha kwa maneno meeengi ya kiingereza ili tukuoneshe kuwa tuna akili nyingi mno.

Dabi iliyopita

Katika mojawapo ya maandiko yanayokuja pameandikwa:

"Pindi walipofanikiwa kufika theluthi ya katikati ya uwanja kulikuwa na mabadiliko kidogo. Hapa ndipo Simba walikuwa hatari zaidi"

"Washambuliaji wa pembeni walikuwa nguzo kubwa sana katika muundo uliokuwa ukitumika msimu uliopita. Na sehemu hii ya muendelezo wa mpira ndipo walipoanza kuwa hai zaidi. Washambuliaji wawili wa pembeni (mara nyingi Kibu na Mpanzu) waliruhusiwa kuingia katikati ya uwanja na kucheza karibu zaidi na mshambuliaji mmoja wa kati. Washambuliaji hawa walitakiwa kusoma ni sehemu gani yenye nafasi na kuitumia kwa manufaa ya timu"

"Mabeki wa pembeni walitakiwa kudumisha mapana ya uwanja na kucheza kama washambuliaji wa pembeni wakifanya mikimbio ya 'ku-overlap' na 'ku-underlap' nyuma ya safu ya ulinzi ya timu pinzani. Pia walitakiwa kutumia nafasi inayoachwa na wapinzani pembeni mwa uwanja kwa kupiga mipira ya krosi hewani au ardhini kuelekea katika eneo la kumi na nane ili kutoa pasi za usaidizi wa mabao"

Yanga chini ya Miloud Hamdi walilenga kuzima maeneo hayo hayo ambayo Simba walikuwa bora zaidi msimu uliopita. Mpango kazi ulikuwa hivi.

Aucho, Abuya na Mudathiri wote walianza kwenye kikosi cha Yanga. Uwepo wa viungo hawa wenye asili ya kuwa viungo wa chini na wenye uwezo wa kupambania mipira ya hamsini kwa hamsini, uliwapa Yanga ugumu katikati ya kiwanja. 

Yanga hawakuweka shinikizo la juu pindi Simba walipoanza kujenga mashambulizi. Mpango ulikuwa kukaa kwenye ‘mid-block’ na kuwanyima wapinzani wao nafasi za kupita katikati ya kiwanja.

Yanga walikuwa ‘aggressive’ sana kila ambapo Simba walijaribu kupita pembeni ya uwanja. Kwa kuwa pembeni mwa uwanja ni sehemu yenye nafasi finyu, Miloud Hamdi aliamua kulitumia hilo kwa faida yake. Washambuliaji wa pembeni wa Yanga walikaa karibu sana na mabeki wa pembeni wa Simba, mabeki wa pembeni wa Yanga walikaa karibu sana na washambuliaji wa pembeni wa Simba.

Jambo hili, likiambatana na jinsi kundi zima la wachezaji wa Yanga lilivyotembea kwa ufanisi toka upande mmoja kwenda mwingine, vilifanya Simba ishindwe kufanya muendelezo wa mpira ili kufika theluthi ya tatu ya kiwanja. Na hapo ndipo walipopoteza mechi.

Tujikumbushe kidogo dabi iliyopita.

Sababu kubwa itakayomfanya Mohammed Hussein amsubiri Chadrak Boka kwenye kikosi cha kwanza hii leo itakuwa umakini kwenye eneo la kuzuia.

Zimbwe amekuwa tajiri wa makosa madogo madogo, haswa yanayotokana na kukosa umakini.

Mechi hizi huwa zina tabia ya kupoteza utulivu. Mchezo kubadilika kuwa wa kikapu huwa jambo la kawaida sana ikifika mishale ya dakika za 30 kipindi cha kwanza, kisha kutegemea na mwenendo wa mchezo hali huenda ikibadilika. Ikitokea kuna timu moja inaongoza kwa goli mbili tutegemee kuona utlivu ukirejea na timu yenye uongozi kupoza mchezo.

 

Waswahili wanasema yaliyopita si ndwele, labda tuwasikilize wahenga, tusiishi sana kwenye yale yaliyopita tugange yajayo.

Dabi ya leo

Kwenye mahojiano kabla ya mechi, Fadlu alisema:

"Sisi tuna faida ya kuwa na kocha yule yule, benchi la ufundi lile lile [la mwaka jana], lakini tuna wachezaji wapya. Ndio, tumejaribu kuwajumuisha wachezaji wengi wapya kwenye timu wakati huu wa pre-season"

"Ni kuhusu elimu kabla ya yote kuhusu namna tunavyocheza. Na tumekuwa na kundi lote pamoja sasa hivi kwa vipindi vitatu vinne vya mazoezi, wachezaji wamerudi kutoka CHAN na mapumziko ya kimataifa ya FIFA, hivyo tumepata vipindi kadhaa vya kuwajumuisha"

"Nadhani presha iko kwa Yanga kwa sababu wana benchi la ufundi jipya. Yanga walishinda mataji yote msimu uliopita wakiwa na makocha watatu tofauti, kwa hiyo presha iko hivi kwao sasa wakiwa na benchi la ufundi jipya lakini wachezaji wale wale ambao inawezekana wako tayari kwa ajili ya dabi [na] inawezekana wanajua cha kutarajia . . . wachezaji wapya wanaweza kuwa na shauku lakini hawajui ukubwa wa dabi"

"Tunajaribu kuchanganya, tunajaribu kutumia wachezaji ambao wameshacheza dabi kabla. Na katika nafasi kadhaa za muhimu tutaweka wachezaji ambao itakuwa dabi yao ya kwanza"

"Sihofii kuwa na timu mpya yenye wachezaji wapya kumi na tatu . . . tuna muendelezo kwenye benchi letu la ufundi na wachezaji wa msingi waliobakia na sasa tuna uti wa mgongo madhubuti sana na nadhani hiyo inatupa faida kuelekea mchezo huu"

Naomba tupuuzie michezo anayotaka kucheza Fadlu kwa kuweka presha kwa benchi la ufundi la Yanga. Badala yake tuzungumzie jinsi gani anaonesha kuwa na imani juu ya wachezaji wake wapya na kikosi kwa ujumla. Ni wazi matarajio yake kwa msimu huu ni makubwa.

Jambo muhimu zaidi kuokota kwenye maneno hayo ni kuwa anaamini kikosi kina 'uti wa mgongo madhubuti' na kwenye mechi ya leo anakwenda kuongezea uti huo wachezaji kadhaa wapya kwenye maeneo muhimu. Labda tujaribu kazi ya Shehe Yahya kidogo: kwa maneno hayo tutegemee Rushine De Reuck atakuwepo kwenye kikosi. Isingelikuwa majeruhi Alassane Kante pia angelikuwa chaguo nyeti kwenye nafasi ya kiungo wa chini. Vivyo hivyo Jonathan Sowah.

Fadlu Davids baada ya mechi ya Simba day alitangaza rasmi kuwa msimu huu wanataka kucheza kwa mfumo wa ‘4-4-2 diamond’ wakiwa na namba tisa wawili. Dhidi ya Gormahia tuliona vivuli vya jinsi mfumo huo unavyoweza kufanya kazi. Lakini, mabadiliko mengi ya wachezaji yalifanya utambuzi wa dhamira halisi kuwa kitu gumu.

Pamoja na hayo, LigiLuu_Xtra hatutakuacha msomaji wetu kapa. Tumekuandalia mlolongo wa matukio ambayo tunategemea yatatokea: 

• Bila hata kuuliza, swala la Simba kucheza ‘4-4-2 diamond’ limeshathibitika. Kama huu ni mpango endelevu kama asemavyo Fadlu basi yeye na benchi lake la ufundi watakuwa wamepanga namna thabiti ya kutumia muundo huo dhidi ya timu yeyote. Swali hapa litakuwa uchaguzi wa kikosi. 
• Tegemea kuona Simba wakiweka shinikizo la juu (high press). Imekuwa kawaida yao na ni msingi mkubwa wa namna wanavyocheza. Ndio, timu ina wachezaji wapya, na inawezekana wachache miongoni mwao wakahusika katika mchezo wa kesho, lakini, misingi haiwezi kubadilika. 
• Tegemea kuona shinikizo la juu likishindwa kufanikiwa. Kwa sababu kadha wa kadha imekuwa kawaida ya Simba kuweka shinikizo eneo la juu la uwanja na kushindwa kulitekeleza kwa ufanisi. Nikifumba macho naona mpira ukiwa miguuni mwa mmojawapo wa viungo wa Yanga, akinyumbulika toka kwenye shinikizo finyu la Simba na kuupeleka mpira kwenye nafasi.
• Tegemea kuona Simba wakirejea kwenye eneo lao kwa nguvu hafifu. Bila kujali majina ya mchezaji mmoja mmoja, tegemea kuona Simba wakichelewa kurudi kwenye umbo la kuzuia baada ya kupoteza mpira na kushindwa kuweka shinikizo la kutosha.
• Tegemea kuona Mpanzu akipata mipira mingi kwenye nafasi, mipira ambayo itakayomruhusu kukokota, ku-combine na namba tisa, na kumalizika kwa pasi au shuti golini — sana sana shuti golini.
• Tegemea walau kosa moja toka kwa Moussa Camara. Kama si kushindwa kukamata mpira wa krosi basi tegemea shuti lililochezwa vibaya. Na kama Yanga watakuwa na uchu wa kupiga golini tegemea kosa hilo litatoka kwenye shuti la mbali.

Mahojiano ya kocha wa Yanga, Romain Folz, yalienda hivi:

"Kwangu mimi nadhani kwenye mechi yoyote kubwa au kwenye klabu yoyote kubwa presha huwepo, muktadha unaooneshwa hivi sasa unatuweka katika nafasi ambayo lazima tuonyehse uwezo, lakini nitakuwa muwazi kwako, kama muktadha ungekuwa tofauti nigefanya kazi kwa namna ile ile na kutaka matokeo yale yale"

"Ulikuwa muktadha wa kipekee sana, tulitoa muda wa kucheza kwa wachezaji wengi sana [kwa kuwa] mara nyingi tulitoa muda mchache wa kucheza . . . mechi ambayo kila mchezaji anapata dakika kumi na tano au ishirini za kucheza muonekano wa mchezo unabadilika sana, naweza kusema ilikuwaa inavutia lakini haikuwa vizuri, inaweza kuwa vizuri zaidi"

"Ilikuwa mechi yetu ya mwisho ya maandalizi [na] tuliichukulia hivyo, pia kulikuwa na vitu vingi ambavyo ilibidi tuvielewe kwenye mchezo ule kulingana na wapinzani wetu baada ya wapinzani wa kesho [hivyo] kuna vipengele vingi vilivyoingia kwenye mchezo wetu wa mwisho wa maandalizi vilivyotokea"

'Mind games' lazima ziwepo kwenye michezo mikubwa kama hii, tuache wataalamu wa kazi hizi waendelee nazo, sisi tufatilie mambo mengine.

Ukimsikiliza Folz unapata hisia ni mtu mwenye uchu na mafanikio, anayepangilia mambo yake na kufuatilia vitu hata viwe vidogo kiasi gani. Anakupa ishara ya kuwa yupo kwa ajili ya kazi na atafanya chochote kukamilisha maazimio yake. Wakati mimi na wewe tunahangaika nini kitaendelea kwenye dabi, yeye anawaza mechi ya kwanza ya ligi.

Folz anaeleza kuwa kilichoonekana siku ya mwananchi kilikuwa kivuli cha kile anachokitaka na kuwa tutegemee maboresho. Hapa naanza kupata shauku ya kujua zaidi kama ule muundo wa kumtumia kiungo wa chini katikati ya mabeki wa kati ulikuwa kitu cha kudumu au alikuwa anafanya majaribio.

Folz alituonyesha kuwa anaweza kutumia muundo wa watu watatu katika msitari wa kwanza wa kujenga mashambulizi katika mechi ya siku ya mwananchi. Hili halikuwepo kipindi walipocheza dhidi ya Rayon Sports kule Rwanda, tukiambatanisha hilo na maneno yake kuna ukakasi kama litajirudia. Kama ilivyokuwa kwa Simba, Yanga pia walitumia wachezaji wengi sana kwenye mechi hiyo, hivyo inakuwa ngumu kung’amua dhamira. Pamoja na hayo:

• Tegemea kuona safu ya ulinzi ya Yanga ikiwa ngumu kupitika. Tangu kipindi cha Nasreddine Naby Yanga wamedumisha uwezo wao wa kuzuia. Tegemea kuona wakizuia kwa namba kubwa.
• Tegemea kuona Yanga wakiheshimu ‘transitions’ haswa zile za kwenda kushambulia. Kama ilivyokuwa kwenye mechi dhidi ya Rayon na pia dhidi ya Bandari, tegemea walau wachezaji wanne au watano kwenye ‘counter attack’ za Yanga.
• Angalau pasi moja itakayokuchanganya akili kwa uzuri wake kutoka kwa Djigui Diarra si kitu kikubwa sana kuomba. Tegemea kuona walau pasi moja ya masafa marefu toka kwa bishoo la kupiga mlege.
• Pacome Zouzoua si Pacome Zouzou bila kukokota mpira. Tegemea kumuona akiendesha kwa kasi ya treni, nyuma yake kukiwa na mabeki wawili watatu wakiomba mungu nyasi zimkwae aanguke ili iwe ahueni kwao. Pia tegemea kumuona akiingia kwenye maeneo yasiyo ya lazima na kujikuta Messi wa ligi ya Tanzania.
• Tegemea kumuona Clement Mzize akiomba mpira kwenye nafasi. Kijana amejibainisha kuwa mshabuliaji bora zaidi kwenye kikosi cha Yanga kwa kufanya mikimbio nyuma ya safu ya ulinzi ya timu pinzani.
• Makosa ya hapa na pale pindi mabeki wa Yanga watakapowekewa shinikizo la kutosha wakiwa na mpira hayaepukiki. Ni kama wameamua iwe tabia. Basi acha iwe tabia.

Asante sana kwa kukaa nasi mpaka mwisho. LigiKuu_Xtra ni tovuti huru na inayojitegemea. Kama umelipenda andiko hili tusaidie kulitangaza popote unapoweza au kumuelekeza rafiki apitie tovuti yetu. Kama wewe ndio huyo rafiki, karibu sana, pitia hapa ujue zaidi. Tunapatikana katika mitandao ya X kwa jina la @ligikuuxtra na Instagram kwa jina la LigiKuu_Xtra, tuunge mkono kwa kufuatilia akaunti zetu na pamoja tupige hatua katika kulijenga soka la Tanzania.